नाशिकचे ओझर विमानतळ आंतरराष्ट्रीय उड्डाणासाठी सज्ज: १२ सप्टेंबरपासून सुरू होणार नवी विमानसेवा

नाशिकमधून आंतरराष्ट्रीय विमानसेवा: पर्यटन, उद्योग क्षेत्राला नवा बळ

नाशिककरांसाठी एक आनंदाची बातमी आहे. नाशिकच्या ओझर विमानतळावरून १२ सप्टेंबरपासून आंतरराष्ट्रीय विमानसेवा सुरू होणार आहे. या नव्या सेवेमुळे नाशिकमधील हवाई कनेक्टिव्हिटी वाढणार असून, उद्योग, पर्यटन, आणि अन्य क्षेत्रातील वाढीला मोठी चालना मिळणार आहे.

आत्तापर्यंत नाशिकच्या ओझर विमानतळावरून 'इंडिगो'ची विमानसेवा दिल्ली, बंगळुरू, अहमदाबाद, हैदराबाद, इंदूर, गोवा, नागपूर यांसारख्या देशांतर्गत शहरांसाठी उपलब्ध होती. मात्र, आता या सेवेत आंतरराष्ट्रीय उड्डाणांचा समावेश होणार आहे. सिंगापूर, बाली, श्रीलंका, थायलंड यांसारख्या पर्यटनस्थळांसाठीही नाशिककरांना थेट विमानसेवा मिळणार आहे.

दररोज सायंकाळी ४:५० वाजता नाशिकहून आंतरराष्ट्रीय उड्डाणे सुरू होणार आहेत. याशिवाय, कनेक्टिंग फ्लाइट्सद्वारे नाशिककर आता अबू धाबी, दुबई, लंडन, न्यूयॉर्क, सिडनी, पॅरिस, रोम, व्हिएन्ना अशा प्रमुख आंतरराष्ट्रीय शहरांमध्येही सहज प्रवास करू शकतील. ही सेवा सुरू झाल्यामुळे नाशिकमधून थेट मुंबईला जाण्याची गरज कमी होणार आहे.

देशांतर्गत सेवा वाढीची गतीही थांबलेली नाही. जम्मू, श्रीनगर, चंदीगड, अमृतसर, वाराणसी, जयपूर यांसारख्या शहरांमध्येही नाशिकहून विमानसेवा उपलब्ध होणार आहे. यामुळे नाशिकमधील पर्यटन, उद्योग आणि इतर व्यावसायिक क्षेत्राला मोठा फायदा होईल.

या सेवांचा विस्तार नाशिकसाठी निश्चितच फायद्याचा ठरेल. शहरातील विमानसेवा वाढल्यामुळे व्यवसायिक आणि प्रवासी यांच्या दृष्टीने नाशिक एक महत्त्वाचे केंद्र बनणार आहे.